Ɣer tagara n useggas leǧnas meṛṛa ad ɛegden, d lɛid n tlalit n Lmasiḥ aked imensi n wass amezwaru n useggas i d-iteddun.
Ayagi a ɣ-d-ismekti ayen akk d-nɛac deg seggas iɛeddan, daɣen a ɣ-iwelleh s usirem ɣer win i d-iteddun. Akken neqqar, yal ass s leɛtab-is d lxiṛat-is, a d-nini i yal aseggas s leɛtab-is d lxiṛat-is.
Asirem yugaren kra yellan d asirem !
Asirem nesɛa, d win yebnan ɣef wazal d yiseɣ n Lmasiḥ. Imi netta d win i d-ilulen s tezmert n Ṛebbi, d win i d-yusan ɣer yemdanen n ddunit meṛṛa iwakken ad yeẓẓu deg-sen asirem. D asirem yugaren kra yellan d asirem.
Lɛid n tlalit n Lmasiḥ, amuli-ines, d win ara yilin d lɛinṣer n usirem i yal amdan i yal lǧil. Imi d netta i ɣ-d-ittarran afud, d netta i yettaken lbenna i tudert. Axaṭeṛ d netta yakan i d "Awal-nni" i s-id-yexleq kra n wayen akk yellan. D netta i d lsas n ddunit, i d tazwara i d tagara. D netta i yseddayen amezruy n tudert yerna a t-yeṣṣiweḍ ɣer yeswi-ines.
Atah, ayɣer i d-yewwi lḥal a neḥrez asirem yerna i yal aseggas tella ṛṛeḥma n Yillu, tella leɛnaya-ines, yis-n ara teffukti tudert n yal amdan.
Tarzeft i talsa meṛṛa!
Mi d-iban Lmasiḥ ger yemdanen, yebda yeṣṣawaḍ lexbaṛ n lxiṛ, d tarzeft i talsa. S imeslayen-agi ara d-nɣeṛ deg adlis n Luqa, i yelli abrid uselmed-ines, s isallen yessefraḥen:
"Mi d-ikker a d-iɣeṛ, fkan-as taktabt n nnbi Iceɛya, yelli-tt, yufa amkan anda yura: Ṛṛuḥ n Sidi Ṛebbi yella fell-i, axaṭeṛ ixtar-iyi iwakken ad beccṛeɣ lexbaṛ n lxiṛ i yimeɣban, ad beccṛeɣ tilelli i yimeḥbas, iwakken ad rreɣ iẓri i yiderɣalen, ad kkseɣ lḥif ɣef wid yettwaḍelmen, ad beccreɣ ɣef useggas i deg ara d-issers Ṛebbi ṛṛehma-ines."
Ayagi a t-naf di Luqa 4: 17-19.
D imeslayen n ḥellu d usirem i yal amdan. Yuɣ lḥal yenna-ten-id nnbi Iceɛya kra n leqrun uqbel talalit n Lmasiḥ. Uran-d fell-as, d akken d netta ara yesnekmalen leslak i d-ihegga Sidi Ṛebbi. Degmi talalit n Lmasiḥ teqqim-d i wmezruy d talemmast d lsas i ddunit meṛṛa.
D talalit tamerbuht i d-yegaln i talsa meṛṛa s ḥellu d lehna. Deg-s ara yafen yemdanen meṛṛa leslak n terwiḥin-nsen d lehna di tudert-nsen.
S imeslayen-agi, i nebɣa ula d nekni, a wen nmenni aseggas n lferḥ, n ṛṛeḥma sɣur Yillu. Aseggas d ameggaz s leɛnaya n Yillu!
A necnu aked lmalayek s ucewwiq-nni i d-yefɣen seg igenwan ass makken i d-ilul Lmasiḥ.
" Lḥemd i Yillu deg imukan ɛlayen !
Lehna di ddunit ɣef yemdanen ɛzizen fell-as ! "
I yal yiwet ! i yal yiwen ! Aseggas d ameggaz s lehna d ṣeḥḥa !
