Yeqqim akken i laẓ i fad, s tiyyita d rregmat. Yerna sbubben-as amidag-nni i ɣef tsemmṛen. Ulayɣer d nenna acḥal iqeṛṛeḥ usemmer-nni ɣef umidag. Yerna ayenni meṛṛa di lbaṭel. Deg ass-nni, yeɣli-d ṭṭlam deg zal. Tewwet zlezla di Yirucalim. Iẓekwan llin. Ffɣen-d ula d lmeggtin. Ayagi yeṣṣaweḍ yiwen userdas n Ṛṛuman ad yini : « S tidett aragaz-agi d Mmis n Ṛebbi ! » Uqbel ad yessufeɣ taṛwiḥt, yenna-d Lmasiḥ kra n imeslayen yesɛan azal i leslak ara yennekmalen s wesfel-ines.
A Baba ɛfu-yasen !
Awal-is amezwaru, yelha-d d wid akken yellan ttqehhiren-t yakan. Yezzwer-asen s usuref d ssmaḥ. Axaṭeṛ ur ẓrin ara d acu xeddmen akken mi tettsemmiren ɣef umidag. D acu kan, asuref-agi i s yendeh, d win ara d yessu i yemdanen meṛṛa. Axaṭeṛ, talsa meṛṛa tuḥwaǧ ɣer ssmaḥ n Yillu. Imi ddunit meṛṛa teɣli di ddnub. Ihi, iqsed-d talsa meṛṛa s leɛfu d ṛṛeḥma n Ṛebbi. Ɣef ayagi i yemmut ɣef umidag.
Ass-agi a ttiliḍ yidi di lǧennet !
Tikelt-agi, yelha-d Lmasiḥ d winna akken ittusemṛen ɣer tama-s. Argaz-agi, yeɛqel tezdeg d tidett n lmasiḥ. Yendeh ɣur-s, iḍleb deg-s leɛfu. Yenna-yas : “ Mmekti-yi-d mara d aseḍ di tgeldit-ik !”. Dɣa Lmasiḥ yenna-yas imiren: “ Ass-agi, a ttiliḍ yidi di lǧennet ”. S wawal-agi, iban-d leɛfu n Lmasiḥ. D leslak i d-yettunfken i yal amdan ara ybeddlen tikli, yal amdan ara yesteɛrfen s tuccḍa-ines zdat Ṛebbi. Tban-d daɣen ṛṛeḥma n Yillu iɛuhden s leslak yal win ara yamnen yis. (Yuḥenna 5:24).
A Yillu-iw, ayɣer akka i yi-teǧǧiḍ ?
Imeslayen-agi weɛren i lefhama. S tidett yeǧǧa Yillu Mmis ? D acu kan s wawal-agi daɣen ara nefhem akken ilaq lmeɛna n lmut n Lmasiḥ ɣef umidag. Nezra belli tadyant-agi n umidag teḍra-d di lɛid n usuref. Anda d izimer ara yemmezlen i leɛfu n ddnubat n yemdanen. Lmasiḥ yeṭṭef amkan-nni. D izimer–nni ara yettunefken d asfel ɣef yemdanen. Degmi i d-yeɣli fell-as uzaglu-nni n lmut. Iḥuss belli yeǧǧa-t Ṛebbi dinna d asfel, ad yemmet ɣef ddunit meṛṛa. Yebbub izgalen d yemdanen meṛṛa. Netta d azedgan, werǧin yecceḍ, lameɛna yeṭṭef amkan n imednuben yuklalen lmut. A nɣer ayagi di tebṛatt tisnat n At Kurintus. ( 2 Kurintus 5 :21).
Kullec yettwakemmel ! A Baba, atan ṛṛuḥ-iw ger ifassen-ik !
D tiɣri n leslak yettwakemlen. D tarennawt n lmasiḥ ɣef umidag. Ixelles ɣef ddnubat n yemdanen meṛṛa. S wesfel-ines, ad yessizdeg imdanen meṛṛa ara t-iqeblen d amsellek-nsen, d ssid-nsen. Idammen-is yuzzlen ɣef umidag ttwaqeblen zdat Ṛebbi. Ad ssirden ddnubat meṛṛa. Ccɣel-nni ɣef t-id-iweṣṣa Yillu ixdem-it, yesnekmal-it. D amcafeɛ ɣef tejlibt-is. Yefka iman-is d asfel fell-as. Tura yezmer ad yerr tarwiḥt-is ger ifassen n Ṛebbi. Win akken i t-id iceggɛen ɣer ddunit. Lekmal-agi ad ibin ass wis tlata, mi ara d-yeḥyu si ger lmeggtin. Ad yali ɣer igenni. Ad yessers Ṛṛuḥ-is ɣef wid meṛṛa ara t-iqeblen di tudert-nsen.
