Akken kan yecceḍ wemdan di tazwara, Ṛebbi ur t-yeǧǧa ara akkenni mebla lweɛd. Yeqsed si tazwara ad yefk amsellek. Deg ixf wis tlata di Laṣel n ddunit, issers-d lweɛd-agi n umsellek ara d-yasen. ( Laṣel n ddunit 3: 15 aked 21). Mi yfaq wemdan belli yecceḍ, yeɛreḍ ad iṣṣer iman-is s ifassen-is, s lecɣal-is. Ma d Ṛebbi, netta yessels-as, iṣṣer-it s weglim, s wesfel amezwaru yakan. Ilaq imiren ad yemmet uɣersiw seg ara s-d-yefṣel aglim-nni i s ara t-yeṣṣer. Ayagi yakan d tikci sɣur Ṛebbi, d asfel i d-ihegga si tazwara.
A neɛqel si tura, ihi, belli, segmi yedneb wemdan, ur yezmir ara ad iqeṛṛeb ɣer Ṛebbi s ifassen-is, d lecɣal-is. D acu kan, a nwali, s wallel i d –ihegga Ṛebbi s timmad-is, netta. Ɣer zdat, deg umezruy n leslak, allel-agi, d Lmasiḥ s yiman-is, ara yefken aglim-is d idammen-is, ad yefk iman-is d asfel. Akka ara nwali si Laṣel n ddunit yakan, i yers lweɛd n leslak ( Laṣel n ddunit, ixf 3).
Lweɛd i leslak si tazwara !
Lweɛd yefka Ṛebbi i Yebṛahim sin igiman iseggasen uqbel talit n Lmasiḥ, degs azal d aɣelnaw. Iweɛd-as a s-yefk tamurt, yerna a t-yerr d agdud meqqren ara yettuberken aṭas. D tamsisit ara yessebded yid-s d dderya-ines si lǧil ɣer lǧil. Tamsisit-agi a ttefk aẓar ɣer zdat, ɣer ddunit meṛṛa, ɣer leǧnas nniḍen. Degmi azal nniḍen ara d-yegmun si lweɛd-agi, d azal i yal amdan ara yerren lettkal-ines di Lmasiḥ, i leslak. Ayagi a t-nwali yakan di Lasel n ddunit deg ixf wis 12. Lmasiḥ a d-yas si dderya n Yebṛahim. Akka i yura di Tira iqedsen belli, Yebṛahim ad yuqel d lbaraka i ddunit meṛṛa.
Iseflawen meṛṛa i s d-yumeṛ Ṛebbi, i wegdud n wat Isṛail, ad ilin d izamulen n wesfel-nni i d-yewɛed si zik. Ad yas iwakken ad yettunefk d asfel ɣef ddemma n yemdanen meṛṛa. Iceɛya yemmeslay-d fell-as (Iceɛya, ixf 53). At zik, llan teddun di liman s umsellek i sen-yewɛed Ṛebbi. D Yebṛahim aked wiyyiḍ. Alamma d taswiɛt i deg ara d-iban Lmasiḥ, ass mi ara d ilal. Dinna a t-walin meṛṛa wid yellan ssaramen deg-s. Di lemtel Semɛun-nni yellan deg ufakan, ass mi qeddmen llufan-nni akken yella di Ṭawrat. (Luqa 2:25-32). Semɛun yeɛqel llufan-nni, d netta i d amsellek-nni i sen yewɛd Ṛebbi si zik. A d-nini s Ṛṛuḥ n Ṛebbi i s d-ittunefk wayagi. A d-nini daɣen, Semɛun yella seg at isṛail-nni yellan ttraǧun ssaramen deg umsellek-nni ara d-yasen. Win akken ɣef d-mmeslayen lenbiyya n lɛehd Aqdim.
Liman d usirem !
S lettkal d laman di Ṛebbi i llan teddun kra seg at Isṛail, alammi i d-iban Lmasiḥ uɣalen ɛeqlen-t s tidett di zzman-is. S teflest-nni ara ttuselken daɣen wid meṛṛa iɛacen uqbel Lmasiḥ axaṭeṛ llan ssaramen deg-s ɣas akken ur t-walan ara di zzman-nsen. Am umedya n Yebṛahim d wiyyiḍ. Am akken daɣen ara nefhem d akken leslak s liman mačči s lecɣal ara yexdem wemdan. Yebṛahim yerra lettkal-ines deg ayen akken i s-yewɛd Ṛebbi, mačči deg ayen ara yexdem netta s ufus-is neɣ s ixemmim-is. D ayen ara nɣar di tebṛatt i wat Ṛuman ( At Ṛuman 4: 1-3).
